Qıtay akimiyeti Dünya sağlıq teşkilâtınıñ mütehassıslarına ilk yañı çeşit koronavirus hastaları aqqında malümat bermedi. Bu aqta The Wall Street Journal gazetası pandemiya sebeplerini tedqiq etken Dünya sağlıq teşkilâtı mütehassıslarına esaslanıp bildire.
Ekspertler Qıtaydan Uhan şeerinde qayd etilgen 174 hastanıñ malümatını istedi. Bu virusnıñ memlekette ne vaqıt ve ne qadar tez tarqalğanını añlamağa yardım eter edi. Bunıñ yerine akimiyet Qıtay alimleri işlegen malümatnıñ qısqasını berdi.
The Wall Street Journal bildirgenine köre, Dünya sağlıq teşkilâtınıñ tahqiqat neticelerine köre, yañı çeşit koronavirus yuqunçı epidemiyası resmiy şekilde tasdıqlağanından eki ay evelsi peyda olğandır. Qıtay akimiyeti malümat bermegenini izaatlamay.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
