Qıtayda 10 biñden ziyade koronavirus infektsiyası adisesi olğanını tasdıqladılar, onıñ neticesinde endi 213 adam elâk oldı.
Büyük Britaniya yanvarniñ 31-inde birinci tasdıqlanğan yoquma adisesi aqqında haber etti, bildire "Amerika sesi"niñ rus hızmeti.
"İngilterede bir qoranta azası olğan eki adam koronavirusnen hastalanğanını tasdıqlay bilemiz", - haber etti memleketniñ Milliy Sağlıq hızmetiniñ başı Cris Witty. Onıñ aytqanına köre, hastalar artıq kerekli tibbiy yardım alalar.
İndistan ve Filippin akimimiyetleri de ilk koronavirus hastaları aqqında bildirdi ve qalğan memleketler cedveline qoşuldı. Bu cedvelde artıq Avstraliya, Kanada, Finlandiya, Almaniya, Hong Kong, Yaponiya, Nepal, Singapur, Cenubiy Koreya, Tailand, Birleşken Arap Emirlikleri, Vyetnam və Rusiya bardır.
Yanvarniñ 30-ında Bütündünya sağlıq teşkilâtı Qıtay koronavirusını global bir fevqulâde vaziyet dep ilân etti.
Yaqında qayd etilgen virus büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
Daa evel Moğolistan ve Qırğızistan Qıtay sıñırını qapattı, dep bildirdi. Özbekistan, Qazahistan ve Turkmenistan sıñırdaki kontrolni quvetleştirdi. Rusiye işğal etken Qırım ve Aqyarda koronavirus telükesi tarqalğanı içün tevsiyeler çıqarıldı.
