Rusiye nezaretindeki Qırım Yuqarı mahkemesi “terorcılıq propagandası”nda qabaatlanğan Qırım cemaat jurnalisti, bloger Nariman Memedeminovnı SİZOdan quvetleştirilgen nezaret kamerasına avuştırdılar.
Bu aqta onıñ advakatı Emil Kurbedinov bildirgeni aqqında “Qırım birdemligi” cemaat birleşmesiniñ saifesinde haber etile.
Qayd etile ki, Narimanğa, ekstremist edebiyatınıñ tartatılmasında, ögrenmesinde, ekstremist idealogiyasınıñ propagandasında qabaatlap, oña raport berildi ve ekstremist idealogiysını ögrengen, tarqatqan ve prodaganda etken şahıs kibi esapqa alındı.
Memedeminov quvetleştirilgen nezaret kamerasına avuştırıldı.
“Bundan ğayrı, advokatı, Nariman sağlığı yaramaylaşqanına şikâyet etkenini qoştı. Bir aydan çoq o tibbiy yardım aqqında muracaat ete, amma SİZO ekimleri buña diqqat etmey. Kurbedinov, müşterisi hastahanege baqıluv ve tedaviylev içün alıp barılmasa, sağlığı fenalaşa bile, dedi”, - dep qayd ete uquq qoruyıcılar.
Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
