«Qırım birdemligi» cemaat birleşmesiniñ faalleri, avgustnıñ 17-nde saba qırımtatrlarnıñ evlerinde keçirilgen tintüvlerden soñ beş insan yaqalanğanını bildireler.
«Tintüvlerden soñ beş adam yaqalandı. Aqyarnıñ Nahimov rayonında FSB hadimleri Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyevni yaqaladı», – dep haber eteler faaller.
Olarnıñ malümatına köre, dörtüni Aqyar boyunca Rusiye FSB-niñ idaresine ketirgenler, Mamaqtan imamnı ise Aqmescit boyunca Rusiye FSB-niñ idaresine.
«Raif Fevziyev medreseni bitirgen yerli imam, qırımtatar faali, çoq balalı baba. Rustem Murasov, Rustem Tairov, Cabbar Bekirov ve Zaur Abdullayev faaller, olar uydurma mahkeme davalarınına muntazam şekilde qatnay ediler, siyasiy mabüslerniñ qorantalarını destekley ediler, öz köylerinde iftarlar ve kütleviy tedbirler keçire ediler», – dep qayd ettiler birleşmede.
Faallerniñ malümatına köre, 2016 senensi fevral ayında Rustem Murasovnıñ evinde tintüv endi keçirilgen edi. O zaman onı tutıp, FSB idaresine alıp ketken ediler, amma soñra yiberdiler.
Cebbar Bekirov, Zaur Abdullayev ve Rustem Tairovnıñ evlerinde tintüvler Aqyarnnı Lenino rayon mahkemesiniñ qararı ile keçirildi.
Aqmescit rayonınıñ Mamaq köyünde avgustvnıñ 17-nde Rusiye quvetçileri sabadan yerli imam Raif Fevziyeviñ evinde tintüv keçireler, dep haber ete Edem Semedlâyev.
Qırımdaki Rusiye qanınun qoruyıcı organlarnı vaziyetni tefsir etmeyler.
