Qırımtatar halqınıñ liderleri, halq deputatları Refat Çubarov ve Mustafa Cemilev mayısnıñ 22-nde Yuqarı Radada keçirilgen nevbetten tış toplaşuvda iştirak etmeyler, çünki çetelde evelden planlaştırılğan iş ziyaretlerinde bulunalar. Bu aqta Qırımtatar Milliy Meclisiniñ reisi Refat Çubarov Facebookta bildirdi.
«Ukraina tışında Ukraina, Qırım ve qırımtatar halqı içün müim tedbirlerde ya da körüşüvlerde iştirak etecegimizni planlaştırğanda er sessiyanıñ başında belgilengen toplaşuvlar cedveline esaslanmağa tırışamız. Nevbetten tış sessiyanı bugün toplamaq ilânı aqqında tünevin men ve Meclis azaları Ankarada bildik, mında qırımtatar halqı genotsidiniñ qurbanlarını añma tedbirleri keçirilmekte, Türkiye ükümetiniñ azaları, çetel elçileri, Türkiyede belli cemaat teşkilâtları, qırımtatar diasporasınıñ vekilleri iştirak ete», – dep aytıla haberde.
Onıñ bildirgenine köre, qırımtatar halqınıñ lideri Mustafa Cemilev mayısnıñ 22-nde Lübnanda buluna. Anda parlament reisi ve Lübnan baş naziri ile körüşecek.
Ukraina Yuqarı Radasınıñ spikeri Andriy Parubiy mayısnıñ 22-nde parlamentniñ nevbetten tış toplaşuvını topladı.
Toplaşuvda deputatlar halq deputatlarınıñ saylavları ve açıq satın aluvlar qanunlarına deñişmeler kirsetilmesi meselesini baqmaq kerek, dep aytıla spikerniñ avalesinde.
Ukraina prezidenti Volodımır Zelenskıy Yuqarı Rada spikeri Andriy Parubiyden halq deputatlarınıñ saylavları qanunına deñişmeler kirsetmek içün parlamentniñ nevbetten tış toplaşuvınıñ keçirilmesini mayısnıñ 22-ne belgilemesini rica etken edi.
Prezidentniñ saytında mayısnıñ 21-nde Ukraina Yuqarı Radasını dağıtuv buyruğı derc etilgen ve nevbetten tış parlament saylavlarınıñ keçirilmesi iyülniñ 21-ne belgilendi.
Ukraina Anayasasına köre, nevbetten tış parlament saylavları Ukraina Yuqarı Radasınıñ vekâletleri vaqtından evel toqtatılğanına dair qarar derc etilgeninden 60 kün içinde keçirile.
