Qırımtatarlarnıñ milliy lideri, Ukraina halq deputatı Mustafa Cemilevniñ taqımı onıñ faaliyeti aqqında haber etmek içün Facebook içtimaiy ağında saifesi deñişkenini haber ete. Bu vaqıtqa qadar Cemilevniñ izaatları ve faaliyeti aqqında diger malümat Ukraina prezidentiniñ qırımtatar halqı işlerinden vekâletlisiniñ saifesinde derc etilgen edi.
«Bu saife (Ukraina prezidentiniñ qırımtatar halqı işlerinden vekâletlisiniñ – QA) Facebookta ilk evelâ qırımtatarlarnıñ lideri, Ukraina prezidentiniñ vekâletlisi ve Ukraina halq deputatı Mustafa Cemilevniñ şahsiy faaliyeti içün açılğanına baqmadan, Mustafa ağanıñ taqımı uzun zamandır saifeniñ adını deñiştirmege tırıştı. Bunıñ içün FB Ukraina ofisiniñ vekilleri de celp etilgen edi, amma, ne yazıq ki, Facebook algoritmleri bunı yapmağa imkân bermedi», – dep aytıla haberde.
Şu sebepten, haber etilgenine köre, «Mustafa Cemilevniñ faaliyeti aqqında aktual malümatnı paylaşmaq içün yañı saifeni qayd etmege qarar alındı».
Ukrainanıñ beşinci prezidenti Petro Poroşenko 2014 senesi avgust ayında Prezidentniñ qırımtatar halqı işlerinden vekâletlisi vazifesini tesis etti. Bu vazifege Mustafa Cemilev tayinlengen edi. 2019 senesi mayısnıñ 18-nde Poroşenko Cemilevni öz isteginen bu vazifeden boşatuv buyruğını imzaladı.
Bundan soñ Cemilev, Zelenskıyge qırımtatarlarnıñ işlerinden vekâletlisiniñ namzetini daa 2019 senesi avgust ayında teklif etkenler, dep bildirdi.
