Altı yıl devam etken Qırımnıñ Rusiye işğaline baqmadan, qırımtatarlar Ukraina vatanperverleri olıp qala, dep bildire Qırımtatar Milliy Meclisi.
«Qırım işğaliniñ altı yılı qırımtatar halqınıñ ve çeşit millet Qırım sakinleri büyük qısmınıñ iradesini qırmadı. Olar Ukraina devletine sadıq ve öz toprağına vefadar qala, Rusiye işğalcilerine qarşı zorbalıqsız barışıq tirenüv aktsiyalarını teşkil ete», – dep aytıla Meclisniñ Rusiye işğaline qarşı Qırım tirenüv künü munasebetinen azırlağan beyanatında.
Beyanatta qayd etilgenine köre, Qırımda «yarımada sakinlerine qarşı kütleviy cinayetler, hususan öldürüv, hırsızlav, ğayıp oluv, siyasiy sebepli taqipler, ayırım, aqsımlav, tecavuz, apiske aluvlar, malümat berilmesine irişmek içün işkence ve sert yanaşuv, psihiatrik hastahanelerge qapatuv, mecburiy avuştıruv ya da Qırımdan sürgünlik yapıla».
Qayd etilgenine köre, Meclis Qırımtatar Milliy Qurultayınıñ icra-temsiliy organı olaraq ve Qurultay qırımtatar halqınıñ temsiliy organı olaraq «Ukrainada tamır halq olğan qırımtatar halqınıñ yekâne milliy idare organları ola ve qırımtatar halqı adından aytmaq ve onıñ menfaatlarını Ukrainada, şu cümleden Qırımda temsil etmek aqqı tek olarğa ait».
Meclis, «Ukraina devletine sadıq qalğan» qırımtatar halqına ve yarımadanıñ bütün sakinlerine teşekkürler bildirip, Qırımnıñ işğalden qurtarılması içün küreşmege devam etecekler, dep işandırdı.
Rusiye kontrolindeki Qırım yolbaşçısı Sergey Aksenovnıñ içtimaiy ağlarda yazğanına köre, o zamannıñ adise-vaqiaları «yarımadanıñ taqdirini belgilegen külminatsion kün» oldı.
Qırım.Aqiqat Radiosında «Rusiye Qırımda. Tirenüvniñ 6 yılı» marafonı başlandı. O, 14:00-ğa qadar (Qırım diñleyicileri içün 15:00-ğa qadar) devam etecek. Marafon Ukrainada fevralniñ 26-nda qayd etilgen Qırımnıñ Rusiye işğaline qarşı tirenüv kününe bağışlana.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
