General-leytenant, ABD Avropadaki quvetleriniñ komandanı Ben Hodgesniñ fikirince, Türkiye «Qırım platformasında» mıtlaqa iştirak etmeli. O, qırımtatarlarnı Türkiye reberliginiñ Rusiyeniñ Qırım ilhaqını tanımamasında «esas sebep» dep adlandırdı.
«Mence, prezident Zelenskıynıñ platforması müim ola. Ve Türkiye bu platformanıñ bir qısmı olacaq bir memleket. Çünki regiondaki memleketler arasında Türkiyeniñ ayrı merağı bar. Qırımtatarlar. Belki de, prezident Erdoğannı Qırım ilhaqını tanımaycağını ve Ukrainağa qol tutqanını açıq bildirmege mecbur etken esas sebep budır», – dedi Ben Hodges.
Türkiyeniñ strategiyası ve «Qırım platformasına» qoşulacaqlar mayısta belli olacaq. O vaqıt yañı muzakere meydançığınıñ ilk sammiti ötkerilmeli. Ukraina tarafı körüşüvni online degil, canlı keçirmege istey.
Qırımda Rusiye kontrolindeki akimiyeti Ukrainanıñ bu teşebbüsini «saçma» dep adlandırdı. «Yaqında Zelenskıy Qırımnı işğalden qurtaqmaq içün munaqaşa meydançığını qurmağa teklif etti. Saçma bir şey. Qırımğa ketirgen zarar meydançığını yapsa edi. Cumhuriyetimizge, Qırım vatandaşlarına, vatandaşlarımıznıñ öldürüvlerine qarşı yapılğan cinayetlernen bağlı olsa», – dedi Qırımnıñ Rusiye parlamentiniñ reisi Vladimir Konstantinov.
Qırımnıñ işğalden qurtarıluvınen bağlı halqara muzakerelerniñ kelecegi aqqında tafsilâtlıca Qırım.Aqiqat saytında oquñız ve seyir etiñiz.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
