Novooleksiyıvka qasabasındaki din cemiyetiniñ vekilleri ve Herson vilâyetiniñ Geniçesk rayonında yaşağan qırımtatarlar Ukraina prezidenti Petro Poroşenko ve Yuqarı Rada deputatı Refat Çubarovğa yarımadanıñ Rusiye mahkemesi tarafından eki ayğa apiske alınğan qırımtatar faali Edem Bekirovnıñ azat etilmesine yardım etmeleri içün muracaatnı imzaladı.
Faaller Türkiye prezidenti Recep Tayyip Erdoğanğa da video muracaatını çıqarıp, «Bekirovnıñ azat etilmesi aqqında Putin ile añlaşmağa» rica etti.
«Qırımtatar cemaatı bütün insanlıqqa muracaat etip, faalimiz Edem Bekirovnı azat etmege rica ete. Dünyada er kes bilsin ki, insan aqları – eñ müimidir. Türkiye prezidentine muracaat etip, semetdeşimizniñ apishaneden azat etilmesi içün Putin ile añlaşmasını rica etemiz», – dep qayd etti Qırım.Aqiqatqa Geniçeskteki «Qırımtatar cemiyeti» cemaat teşkilâtınıñ reisi Nariman Ablâzov.
Novooleksiyıvka qasabasınıñ camisinde Edem Bekirovnıñ tez vaqıtta azat etilmesi içün dua yapıldı. Novoalekseyevka camisiniñ imamı Üsein Tohlu Bekirovnı aytıp, onı «qırımtatar halqınıñ ruh küçü timsalinen» qıyasladı.
Qırımtatarlar Bekirovnıñ serbestligi içün dua etti (süret toplamı)
«Edem Bekirov – din cemiyetimizniñ azası, aqsaqallardan biri. O – halqımıznıñ ruh küçü tüşmegeniniñ timsalidir. Aman-aman bütün vaqialarda iştirak etti, bu caminiñ qurucılığında da. Oğrağan vaziyeti – bizim acımızdır. O, apiste yata, halqımız ise sıñır tışında», – dep ayttı Üsein Tohlu.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
