Qırımtatar asıllı ukrain rejissöri Nariman Aliyevniñ «Evge» filmi Ukrainanıñ «Zolota Dzığa» dördünci milliy kino mukâfatıda nominatsiyalarnıñ sayısına köre lider ola.
Mukâfatnıñ matbuat hızmeti bildirgenine köre, mayısnıñ 3-nde «ukrain Oskarı» ilk sefer canlı yayında online keçecek.
Canlı yayın Ukraina kinoakademiyasınıñ YouTube kanalında olacaq .
«Evge» eñ çoq nominatsiyanı qazandı – film 11 kategoriyada mukâfat ala bile. «Fikirlerim sessiz» komediâsınıñ 9 nominatsiyası, «Gutsulki Ksenii» 9 nominatsiyası, «Vulkan» 8, «Zahar Berkut» levhasınıñ 7 nominatsiyası bar.
Martnıñ 18-nden başlap «Evge» filmini online baqmaq mümkün.
Qırımtatar rejissöri Nariman Aliyevniñ «Evge» filmi «Eñ eyi uzun film» nominatsiyasında «Kinokolo» Ukraina kinokritikleri milliy mukâfatını aldı. Levha 7-inci Halqara Bosfor film festivaliniñ eñ eyi çetel filmi olaraq tanıldı.
Nariman Aliyevniñ filmi «Oskar» mukâfatınıñ long listine kirdi. Film, Odesa halqara film festivalinde gran-pri qazandı.
Aliyevniñ «Evge» filmi Cannes festivaliniñ «Ayrı bir baqış» yarış programmasınıñ iştirakçisi edi, Bükreşteki halqara kinofestivalinde eñ eyi film mukâfatını qazandı.
Süjetke köre, baş qaraman Mustafanıñ (bu rolni qırımtatar asıllı ukrainalı oyuncı ve rejissör Ahtem Seitablayev – QA) büyük oğlu Ukraina şarqındaki cenkte elâk ola. O, onı vatanda, Rusiye işğal etken Qırımda defin etmege qarar ala. Küçük oğlu ve elâk olğan oğlunıñ naaşınen beraber Mustafa yarımadağa yol ala.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
