Qırımtatar Milliy Meclisi, qırımtatarlarğa sürgünlik yerlerinden Vatanğa qaytmağa yardım etken yapon siyasetçisi Sadako Ogatanıñ vefatı munasebetinen taziyeler bildire.
Meclis reisi Refat Çubarovnıñ bildirgenine köre, Sadako Ogata 92 yaşında vefat etti.
«Sadako Ogata – yapon devlet ve siyaset erbabı, diplomat, 1991 senesi yanvarniñ 1-nden başlap 2000 senesi dekabrniñ 31-ne qadar BM qaçaqlarnıñ işleri boyunca Yuqarı komissarı. Sadako Ogata qırımtatar halqınıñ sürgünlik yerlerinden Vatanğa qaytqanını körmek içün Qırımğa barğan BM yüksek seviyeli ilk memurı edi», – dep yazdı Çubarov Facebookta.
Onıñ malümatına koyer, 1997 senesi sentâbr ayında Sadako Ogata eki kün Qırımda olıp, qırımtatarlar toplu yaşağan Vasiyet (Stroganovka) qasabasına bardı ve Qırımtatar Milliy Meclisiniñ azaları ve qasaba sakinlerinen subetleşken edi.
«Qırım ziyareti ve yarımadağa barğan soñ Ukraina ve Özbekistan reberligi ile kerçekleştirilgen muzakerelerniñ neticelerinden biri o vaqıt Özbekistandan ve diger eski sovet devletlerinden Qırımğa qaytqan 80 biñden ziyade qırımtatarına berilgen Ukraina vatandaşlığı oldı», – dedi Çubarov.
Meclis reisiniñ qayd etkenine köre, bu «sürgünlik yerlerinden vatanına qaytqan on biñlernen qırımtatarınıñ uquqiy vaziyetiniñ eyileşüvi ve büyük ilerilevi» oldı.
«Sadako Ogata hanım efendiniñ adı qırımtatar halqınıñ hatırasında oña Vatanına qaytmağa yardım etken ve Qırımnıñ tamır halqınıñ aqlarınıñ ğayrıdan tiklenmesine issesini qoşqanlarnıñ adlarınen beraber yaşamaqta», – dep yazdı Çubarov.
Sadako Ogata 1927 senesi Tokioda diplomat qorantasında dünyağa keldi, qartbabası yapon baş naziri Tsuyesi İnukayu edi. O, BM Yaponiya temsilciliginde elçi mesleatçısı, BM Bala fondu idaresiniñ reberi oldı, BM insan aqları komitetinden memleketini temsil etken edi.
Ogata BM qaçaqlar işleri boyunca Yuqarı komissarı vazifesini alğan ilk Yaponiya vatandaşı oldı.
