Qırımtatarlarğa qol tutqan «Strategiya-18» Rusiye teşebbüsiniñ faalleri er aylıq aktsiyalarını karantin sebebinden içtimaiy ağlarda keçire. Moskva soqaqlarında narazılıq aktsiyalarını ötkermege imkân yoq, internet ise bağ vastası olıp qala, dep bildire aktsiya iştirakçisi Vera Lavreşina Qırım.Aqiqatqa.
«Strategiya-18» o qadar zor şaraitlerde daa keçirilmegen edi. Er yerde nezaret kameraları qoyuldı, politsiya hadimleri ekişer-ekişer yüre, bizim vazifemiz – bu qıyınlıqlarnı yeñmek, tutulmamaqtır. Şimdi üçten çoq degil, ekiden çoq insanğa toplaşmağa imkân bermezler. Amma bu soqaqlar, ağda ise berabermiz: Sankt-Peterburg, Moskva, Qırım ve Kyiv. Buña keder etip olamazlar… Elbette, yasaqlar içün uyğun bu vaqıtta narazılıq aktsiyalarınıñ keçirilüvi tamamen yasaqlana. Vaziyetke baqsaq, olarnı tamamen unutmaq kerekmiz. Amma bu bizim aqqımızda degil», – dedi Lavreşina.
Faaller «Hizb ut-Tahrir davalarınıñ» ketişatı, siyasiy mabüslerniñ vaziyeti aqqında malümat bere, Qırımnıñ işğalden qurtarıluvını ve Rusiye ve Ukraina arasında mabüslerniñ deñişimini talap ete.
Aktsiya iştirakçileri yazuvlı şiarlarnen şeer soqaqlarında çıqarılğan arhiv fotoresimlerini ve evde çıqarılğan yañı soylarını derc ete. Yazuvlı şiarlarda böyle yazılar bar: «Pandemiya vaziyetinde Rusiye Federatsiyasınıñ er angi ükmü – ölümdir», «Qırımlı siyasiy mabüsler arasında 50 yaştan büyük çoq insan telüke altındadır», «Siyasiy repressiyalarnı toqtatmaq» ve digerleri.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
