Qırımtatar siyasiy mabüsi ve vatandaş jurnalisti Remzi Bekirovnı Kranoyarsk tarafına Yeniseyskniñ 2-nci cezahanesine etap ettiler, dep bildire "Qırım birdemligi" cemaat birleşmesi.
Mahkemeniñ qararına binaen 5 yılnı o apishanede keçirilmeli, qalğan müddetni ise sert rejim cezahanesinde.
İyünniñ 30-nda diger qırımtatar siyasiy mabüsi Arsen Abhairovnıñ davası boyunca mahkeme oturışında advokatqa Bekirovnı da Abhairovnıñ bulunğan cezahanege etap etkenlerini haber ettiler. Jurnalistni apishanege kellip çıqqan soñ karantin kamerasına yerleştirgenler.
"Uzun müddet Remzi Novoçerkask SİZO-sından Krasnoyarsk tarafındaki apishanege keter eken bütün müddet devamında onıñ qayda olğanını bilmedik", - dep qoştı advokat Edeme Semedlâyev.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
