Aqmescit – Baardeki tarla işleriniñ yekünlevini tatar ve başqırlar – Sabantuy ile – Qırım merkezinde qayd ettiler. Vernadskiy adına Tavriya Milliy universiteti artında Salğır boyunda tahminen 400 adam toplaştı. Musafir ve iştirakçiler yarımadanıñ çeşit köşelerinden keldiler. Olarnıñ arasında Meclis azaları da bar edi.
Bu sene Sabantuy Rusiye künü bayramı ile rast keldi – Qırımda bu kün birinci kere devlet seviyesinde ötkerile. Faqat Sabantuyda Rusiye Federatsiyasınıñ devlet bayramını iç bir şey añdırmay edi. Mında, ne Rusiyeniñ, ne firqalarnıñ, ne de hayırlavlar olmadı. Amma, aynı zamanda, qırımtatar bayraqlarınen yaraştırılğan çadırlarnı körmek mümkün edi. Şu çadırlarda qırımtatar timsalleri, qırımtatarlar tarihı aqqında kitaplar ve diger şeyler satıldı.
Seyircilerni «Selsebil», «Yıldız», «Uçan-su» ve diger qırımtatar ansamblleri eglendirdi. İstegenlerni pilâv ve milliy yemeklernen sıyladılar. Tamam bu yerde qırımtatar küreşi ve toban tolu çuvallar yarışını ötkerdiler.
Sport yarışlarında ekseriyetnen balalar iştirak etti. Ğaliplerge bahşış ve para mukâfatı berildi.
İdil boyu tatarlardan biri Rauf teessuratlarnen paylaştı: «Men er daim mında kelem. Bu bizim an-anemizdir». Erkekniñ aytqanına köre, o tarla işlerinen oğraşa – bostanda hıyar, biber, pomidor asray. Amma, bu sene ayazdan sebep, meyva terekleri açmadı, onıñ içün yıl bereketli olmaycaq, dey. Lâkin, er alda ruhtan tüşmey. O Rusiyede doğdı ve iyunniñ 12-si onıñ içün eki qat bayramdır.
Kelgenlerniñ bazıları tatar ve başqırlarnıñ milliy kiyimlerinde ediler. İhtiyar yaşına kelgen Camilâ hanım, Başqorqostanda doğdı, 1945 senesinden ise, Aqyarda yaşay. Dostlarından biri dey: «O bizim amayılımızdır»
Qırım.Aqiqat tedbirge kelgen siyasetçi, deputat ve memurlarnen subetleşti.
– Biz soñki 20 yıl içinde er yıl Sabantuynı keçiremiz. Musafirlerimiz pek çoq, bu cümleden qırımtatarları ve diger millet vekilleri de bar. Bu sene Rusiye Federatsiyasınıñ terkibinde bulunıp, Sabantuynı keçiremiz. Moskva ve Qazandan musafirler keldi.
Konstantin Rubanenko, Bağçasaray meri:
– Qazandan bir qaç kün evelsi qayttım, anda tatarlarnıñ tuvğan toprağı Tatarstanda bu bayramnıñ ötkerilüv adetlerinen tanış olğandan soñ, bugünki tedbirge kelmemege küç oldı. Bayramnı Bağçasarayda teşkil etecek edik, amma soñra Aqmescitte ötkermege qarar alındı, kelecek sene şeerimizde ötkermege tırışırmız.
Fevzi Yakubov, Qırım müendis pedagogika universitetiniñ rekotrı:
– Bu bayram, halqnı toplaşa. Misal içün, menden sorasa ediler – siz qırımtatarlar özüñizni nasıl duyasıñız? Men, Sabantuynı birlikte qayd etmemiz kerek, dep aytır edim, bunda eyi bir timsal bar.
Aziz Abdullayev, «Qırım birligi» cemaat teşkilâtınıñ reislerinden biri:
– Bugün bizim dostlarımız ve arqadaşlarımız semetdeşlerini, qırımtatarlarnı davet eteler. Ne sebepten kelmeyik? Biz kelmemiz kerek ve birlikte bayramlarnı keçirmelimiz.
Zaur Smirnov, sürgün etilgen vatandaşlar ve milletler işleri boyunca Qırım Cumhuriyet komitetiniñ reisi:
– Rusiye künü ve Sabantuy bayramlarnıñ ötkerilüvinde bala ve qartlarnıñ bulunuvı kelecekkke ümüt bere. Bu kibi bayramlar çoqça ötkerilmesi kerek. Olar kütleviy şekilde ötkerilip, olarnıñ teşkil etilüvinde iştirak etmeli.
Rustam Temirgaliyev, Qırımnıñ sabıq «baş nazirniñ birinci muavini»:
– Bu bayram ayırı mana taşıy: birinciden, Rusiye Federatsiyasına qoşulğan Qırımda qayd etile. Pek yahşı teessuratlar qaldıra.
Remzi İlyasov, «Qırımnıñ Devlet şurası vitse-spikeri», qırımtatar halqı Meclisiniñ azası:
– Biz em tatar, em musulman, em hristian, em rus, em ukrain bayramlarnı birlikte ötkermelimiz. Böyle vaziyette biri-birimizni añlap olurmız.
