Aprelniñ 6-nda Rusiye quvetçileri tarafından yaqalanğan vatandaş jurnalisti Amet Suleymanovnıñ sağlığı SİZO-da zayıflaştı. Bunıñ aqqında Kreml siyasiy mabüsleriniñ soy-sopları birleşmesiniñ saytında haber etile.
"Amet menden onıñ nefes almasını, spazm ve nefes tarlığını qolaylaştıracaq müim ilâclarnı almamnı istedi. Bu künleri ilâclar içün sertifikatlar, vesiqalar azırladım, çünki er şey o qadar da qolay degil", - dep bildirdi apayı Lilâ Lümanova.
Suleymanovnıñ yürek hastalığı Rusiye ükümetiniñ apis altında tutmağa izin bermegen hastalıqlar cedvelindedir. Amma bu Rusiye akimiyeti içün delil degil, dep yazıla bildirmede.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
