Rusiye tarafından apis cezasına mahküm etilgen cemaat jurnalisti Amet Suleymanovnıñ cezahanege etap etilüvini iskence dep sayamız, dep bildirdi Ukrayina Yuqarı Radasınıñ insan aqları vekâletlisi Dmıtro Lubinets.
Osbudsman Suleymanovnıñ yürek qapağınıñ deñiştirilmesi içün acele ameliyatqa ihtiyacı olğanını hatırlattı. Sağlığınıñ fenalaşqanına baqmadan qırımtatarnı Aqmescit SİZO-sından Rusiye cezahanesine etap etkenler. Aynı zamanda ne yerge etap etilgeni aqqında advokatqa bile aytmağanlar.
Ombudsmannıñ bildirgenine köre, nefes ve yüksek qan basımı ile qıyınlıqlar çekkeni içün Suleymanovnıñ ilâclarğa ihtiyacı bar. İşğalciler ise en kerekli tibbiy yardımnı köstermeyler ekenler, em pek müim olğan ilâcalarını da tutıp alğanlar.
"Siyasiy mabüsniñ böyle alda etap etilmesini iskenceler dep sayamız", - dep ayttı ombudsman.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
