Rusiye tarafından apis cezasına mahküm etilgen qırımtatar Amet Suleymanov Qırımdan Vladimir şeerindeki "T-2 Vladimirskiy tsentral"ğa etap etile. Bunı ZMINA insan aqları merkezi haber ete.
Suleymanov, ağı hastalağı sebebinden ceza çekmeden azat etilmesi ile bağlı mudafaa tarafınıñ muracaatı baqılmasına baqmadan. Suleymanov avgustnıñ 27-nde Rusiye territoriyasına etap etildi. Nevbetteki mahkeme oturışı sentâbrniñ 27-nde olıp keçmek kerek, dep yazıla bildirmede.
Advokat Lilâ Gemeciniñ sözlerine köre, Suleymanovnıñ etap etilgeni cezahaneniñ namı yaramay eken.
Adliyeciniñ sözlerine köre, mabüslerni başta Keriçke ketireler, andan ise Krasnodarğa alıp keteler. Yol 500 kilometrden çoqtır. Bütün bu vaqıt devamında adamlar 80х80 sm olğan arabanıñ qapalı bölüginde oturmaq mecburlar.
Krasnodardan soñ mabüslerni Vladimirge alıp keteler. "Bir şeerge barıp yetken soñ anda bir-eki kün SİZo-da keçire bileler, soñra başqa yer ola bile. Yani yol bir ay qadar süre bile", - dep qayd etti advokat.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
