"Qırım musulmanları davası" boyunca apis cezasına mahküm etilgen Eskender Abdulganiyev apishanede tayin etilgen müddetten ziyade tutula. Evel Cenübiy bölgeniñ arbiy mahkemesi onı 12 yıl apis cezasına mahküm etken edi. Olardan üç yılnı o eñ sert şaraitte keçirmek kerek edi. Bunı "Qırım birdemligi" cemaat birleşmesine advokat Rustem Kâmilev haber etti.
Kâmilev Eskender Abdulganiyevni sert rejim apishanesinden tezden avuştırılması talabınen mahkemege ariza berdi. O, apishanede bulunuv müddeti yaqalanğan künden esaplanmaq kerek olğanını qayd etti. Qırımtatar ise 2019 senesinden berli apisli. Bunıñ içün onı daa keçken sene avuştırmaq kerek ediler. Şimdi Abdulganiyev Vladimirskiy tsentralda tutula.
"Apishane şaraiti cezahane şaraitinden daa serttir. İnsan müddetinden ziyade anda bulunmamalı", - dep ayttı Kâmilev.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
