Qırımtatar Server Mustafayevni Rusiyeniñ Tambov vilâyetiniñ cezahanesinde sert şaraitte tutalar. Bu aqta onıñ ömür arqadaşı Mayye bildirdi, dep haber ete "Qırım birdemligi".
Onı terrorizmge meyilli olaraq profilaktika cedveline de alğanlar. Mustafayevniñ aytqanına köre, onıñ sert tutuv şaraitlerine avuştırılmasını böyle añlattılar: "Şahsiy bir şey yoq, maddeniñ ağırlığından sebep".
''Bütün bular Serverniñ bir de bir areketleri sebebinden degil, o mahküm etilgen madde sebebinden. Asılında bu, ükümge qoşma ceza", - dep ayta onıñ qadını Mustafayeva.
O, SİZOda bulunğanı içün onı kameradan oquşqa çıqarıp olamaylar - 2023 senesi qırımlı uquq fakultetine ğoyabiy bölğkke kirdi.
Bundan da ğayrı, bildirilgeni kibi, sert şaraitke avuştırılğan soñ Mustafayevniñ körme problemleri peyda olğan - o, tek közlüknen oquy ve yaza.
Server Mustafayev – «Qırım birdemligi» cemaat birleşmesiniñ koordinatorı. 2018 senesi tintüvlerden soñ uquq qoruyıcılar Server Mustafayev ve Edem Smailovnı apiske aldı.
2020 senesi sentâbrniñ 16-nda Rostov-na-Donudaki Cenübiy okrugınıñ arbiy mahkemesinde qırımlı aq qorçalayıcı 14 yılğa azatlıqtan marum etildi. Qabaatlar Bağçasaraydaki «Hizb ut-Tahrir davasına» ilâve etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
