Rusiye mahkemesi tarafından 6 yıl apis cezasına mahküm etilgen qırımtatar Rustem Osmanovnı Rusiye koloniyasında işkencege oğratalar. Bu aqta ukrayin ombudsmanı Dmıtro Lubinets bildirdi.
Onıñ aytqanına köre, soñki üç afta devamında qırımlı ceza izolâtorında tutula. Oña nisbeten qanunsız areketler yapıla: onı pek urıp, öldürmeknen qorquzalar.
"Şimdi böyle vaqialarğa susmaq — tecavuzcınıñ yañı cinayetler işlemek iştahını qozğatmaq demektir! Hususan, qanunsız sürgün etilgen vatandaş ve arbiy esirlerniñ ruhlarını bastırmaq içün qullanılğan taktikası devam ete", — dep qayd etti Lubinets.
"Qırım aq qorçalayıcı gruppasınıñ" bildirgenine köre, Osmanov 2022 senesi aprel ayında "Ermeni Bazar kiriş noqtasından Qırımğa kirmege tırışqanda" tutuldı.
Avgust ayında Qırımnıñ Rusiye kontrolindeki Qarasuvbazar rayon mahkemesi Osmanovnı "Noman Çelebicihan" qırımtatar göñülli batalyonında iştirak etkeninde qabaatlap, 6 yılğa üküm etti. Şimdi, aq qorçalayıcılarnıñ malümatına köre, Osmanov Rusiyeniñ Tula vilâyetindeki Donskıy şeerindeki koloniyada buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
