Qırımtatar Resurs Merkezi içtimaiy ağlarda #LIBERATECRIMEA şiarını tarqatıp, Halqara tamır halqlar kününe bağışlanğan "Tamır halqlarnıñ öz muqadderatını tayin etme aqqı bar" şiarına qoşulmağa çağırdı. Bu aqta teşkilâtnıñ Facebook saifesinde haber etile.
"Er yıl avgustnıñ 9-nda Dünya tamır halqlarınıñ Halqara künü qayd etile. Dünyada 90 memlekette yaşağan tahminen 476 million tamır halqı bar. Ukrayinada ise 3 tamır halq bar: qırımtatarlar, qaraylar ve qırımçaqlar. Bizim zenginligimiz çeşitligimizde olğanını añlamaq kerekmiz, amma, teessüf ki, endi on yıl devamında tamır halqlar cenk şaraitinde yaşaylar. Bundan da ğayrı, Rusiye tamır halqlarnıñ vatanı Qırımnı arbiy tehnika ve Ukrayinağa yapılğan bombardıman içün qullanmaqta", — dep aytıla haberde.
Qırımtatar Resurs Merkezi, içtimaiy ağlarda #LIBERATECRIMEA şiarını ve heştegni tarqatıp, "Tamır halqlarnıñ öz muqadderatını tayin etme aqqı bar" çağıruvına qoşulmağa çağırdı.
Bundan ğayrı, teşkilât ukrayin akimiyetini Qırımtatar Milliy Meclisini qanuniyleştirmege çağıra. Mesele tamır halqnıñ temsiliy organı olaraq Meclisniñ uquqiy statusınıñ pekitilmesidir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
