Qırımtatar resurs merkezi Qırımnıñ suvnen teminlevi aqqında malümat kampaniyasını başlatqanını ilân etti.
Haber etilgeni kibi, «İşğalcige bir tamçı bile yoq» adlı kampaniya, «Qırımdaki vaziyet ve onıñ ola bilecek aqibetderi aqqında halqara toplulıqnı haberdar etmek içün kerek».
«Suv qıtlığı mevzusı 2020 senesi daa da kergineşti. İşğalciler bu meseleni faal şekilde meşkr ettirmege devam eteler ve türlü bildirmeler yapalar. Endi bir qaç kere Rusiye suv qıtlığında Ukrainanı qabaatladı ve halqara toplulığını Kyivniñ insaniyetsiz areketlerine diqqat etmege çağırdı», – dep qayd eteler merkezde.
Daa uquq qoruyıcılarnıñ fikrince, Qırım ealisiniñ suv ile temin etilmesine tesir etken yarımadanıñ rus arbiyleştirilüviniñ devam etmesine diqqat ettiler.
Qırımtatar resurs merkezi, «kimniñ kerçekten suvdan marum qalğanı ve kimniñ qabaatlı olğanı» aqqında haberdar etmege niyetindedir.
İnsan aqları Avropa mahkemesi, Rusiye ükümetiniñ Ukrainağa qarşı devletlerara şikâyetinde muvaqqat tedbirler talabını red etti. Söz, Ukrainanıñ Qırımğa tatlı suv kelmesiniñ bloklavını ve milliy ve til azlıqlarnıñ aqlarını sıñırlmağa toqtatması talabı aqqındadır.
Evel belli olğanına köre, Rusiyeniñ baş prokurorı İnsan aqları Avropa mahkemesine Ukrainağa Qırımnıñ suv blokadası sebebinden şikâyet bergen.
Ukraina prezidentiniñ Qırım MC-deki daimiy temsilcisi Anton Körineviç Rusiyenin Ukrainağa qarşı İnsan aqları Avropa mahkemesine bergen şikâyetine «propagandist adım» dedi.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
