Cannes kinofestivaliniñ «Ayrı bir baqış» (Un Certain Regard) yarış programmasında qırımtatar rejissöri Nariman Aliyevniñ «Evge» filmi kösterilecek. Bu aqta rejissörniñ matbuat hızmeti Qırım.Aqiqatqa bildirdi.
«Debüt işini Cannes festivalinde taqdim etmek – büyük şereftir. Er bir kinematografist bunı arz ete, men de istisna degil edim. Bu film olsun dep, çoq ve sebatnen areket ettik. Leyha üzerinde çalışqan bütün taqımğa minnetdarım», – dep ayttı Aliyev.
«Evge» levhası qırımtatarı Mustafa aqqında tarif ete. Eki oğlu Qırım işğalinden soñ Kyivge ketti. Büyük oğlu Nazim vefat ete, babası onı Qırımğa alıp, musulman ananelerine köre defin etmek ve küçük oğlu Alimni evge qaytarmaq içün paytahtqa yol ala.
Ukraina Devlet kinosınıñ yolbaşçısı Filipp İlyenko Nariman Aliyevni tebriklep, şunı qayd etti: «Qırımtatar rejissöriniñ ukrain levhasınıñ Cannes kinofestivaliniñ yarış programmasına kirsetilüvi tek kinematografik degil de, içtimaiy-siyasiy vaqia ola. Eki yıldan berli Ukraina içün müim olğan mevzuda film dünya kino vaqiası çerçivesinde yanğıraycaq. Bizim içün bu endi ğalebe ola».
«Evge» filminiñ baş rollerini Ahtem Seitablayev («Kiborğı» rejissöri) ve Remzi Bilâlov oynadı. Levha prodüseri Vladimir Yatsenko («Dıke pole») oldı, film yapıluvınen ise Limelite kino şirketi oğraştı. Film Ukraina medeniyet nazirliginiñ yardımınen çıqarıldı, onıñ halqara satışınen ise Wild Bunch şirketi oğraşacaq.
«Filmniñ Cannes festivaliniñ yarışında iştirak etmesi – er bir rejissör ve prodüser içün zenaat töpesidir. Un Certain Regard («Ayrı bir baqış» – QA) programmasına debüt filmler pek az saylana, Nariman ile bizim birinci adımımız olğanına quvanam. Festivalde ğalebe qazanmaq içün küreşecekmiz, ve eminim, filmniñ muvafaqiyetli festival taqdiri tek başlana. Ümüt etem ki, bu Ukrainadaki Oskar komitetine «Evge» filmini memleketimizni Oskar yarışında lâyıq bir şekilde temsil etecek film olaraq saylamasını baqmağa imkân berecek», – dep ayta Yatsenko.
«Ayrı bir baqış» – Cannes kinofestivaliniñ ekinci derece (esas yarıştan soñ) müim programmasıdır. Farqlı zamanlarda bu programmada rejissörlar Yorgos Lanthimos, Kim Ki Duk, Apiçatpong Verasetakul ve digerleri ğalip çıqqan edi.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
72-nci Cannes kinofestivali mayısnıñ 14-nden 25-ne qadar devam etecektir.
