Link açıqlığı

Qırımtatar referendumınıñ keçirilmesi içün şaraitler yoq, – Cemilev


Qırımtatarlar Qırım statusı aqqında milliy referendumnı serbest keçirmek içün şarait olğanda ötkerecekler.

Bunı qırımtatar halqınıñ lideri Mustafa Cemilev Qırım.Aqiqat saytına berilgen intervyüsında bildirdi.

Martnıñ 29-da keçirilgen Qurultayda başından tek qırımtatarlar arasında referendum keçirilmesi baqılacaq edi. «Yazıq ki, Qurultay endi çalışmağa başlağan soñ halqımıznıñ havfsızlığınen bağlı meseleler çıqtı», – dedi Cemilev.

Onıñ sözlerine köre, o vaqıtqa baqqanda, Qurultay öyle qarar alıp olamay edi. «Biz keçirecek referendum açıq, halqara közeticilerniñ nezareti altında ötkerilmesini isteymiz. Şimdi ise, Qırımğa halqara nezaretçilerni yibermegenleri içün bunı yapıp olamaymız. Şu sebepten bu şartlarnı meydanğa ketirmek içün vaqıt kerek», – dep añlattı Cemilev.

Bundan ğayrı, Cemilev martnıñ 16-da keçirilgen referendum qanunsız olğanını daa bir kere qayd etti. «Bizde bu referendum sahte olğanını tasdıqlağan malümatlar bar. Qırımtatarlar bu referendumda iştirak etmegenler. Boykotqa bütün halqımız qol tuttı». Mustafa Cemilev dey ki, Qırımnen bağlı ve onıñ tamır halqı qırımtatarlarnıñ menfaatlarını köz ögüne almayıp, qabul etilgen bütün qararlar halqara qanundalarğa köre qanunsız sayıla.

«Şunıñ içün biz daa öz fikirimizni bildirermiz. Em bu fikirimizniñ eñ qandırıcı soyu referendum olacaqtır. Biz onı kelişken şarait olğanınen keçirerik», – dep yekünledi Cemilev.
XS
SM
MD
LG