Ukraina Tış işler nazirligi ukrain elementi «Örnek - qırımtatar örneginiñ ve onıñ aqqında bilginiñ» UNESCO-nıñ ğayrı maddiy Medeniy mirasnıñ kösterüv cedveline alınmasını bekley.
Bunı Qırım.Aqiqatqa Ukraina TİN yolbaşçısınıñ birinci muavini Emine Ceppar haber etti.
«Dekabrniñ 16-nda Ğayrı maddiy medeniy miras muafazası üzre Ükümetlerara komitetiniñ 16-ncı sessiyasınıñ (Paris, Frenkistan) oturşı vaqtında ukrain elementi "Örnek - qırımtatar örneginiñ ve onıñ aqqında bilginiñ" UNESCO-nıñ ğayrı maddiy Medeniy mirasnıñ kösterüv cedveline alınması ile bağlı qararnıñ qabul etilmesi beklenile. Qayd etmek kerek ki, YÜNESKO-nıñ kâtibiyetinde munasip qararda aks etilecek dosye ile bağlı Qıymetlendirme organınıñ müsbet yekünini tasdıqladılar», – dedi Ceppar.
2018 senesi Ukraina Medeniyet nazirligi qırımtatar örnegini medeniy miras cedveline kirsetti.Medeniyet nazirliginde, qırımtatar örnegi ve onıñ elementleri bezekler olaraq esas itibarı ile nağışta, urbada, ayaqqaplarda, baş kiyimlerinde, türlü aksessuarlar çeşitlerinde, quyumcılıq eserlerinde ve turmuş eşyaları: keramik ve maden savutlar, ağaç eşyalar, ev eşyaları, mebel bezetilmeleri ve kilim töşemelerinde qullanılalar. O, muim bir özüni tanıma elementi, er bir qırımtatar qorantasınıñ ayatındaki ayırılmaz bir parçadır.