Qırımtatar Milliy Meclisiniñ reisi Refat Çubarov Türkiye akimiyetinden işğal etilgen Qırımdan olğan "resmiy şahıslarnen" temaslarğa yanaşmalarını sertleştirmesini istmek niyetindedir. Bunı o Qırım.Aqiqatqa Rusiyeniñ nezareti altında olğan Yalta memuriyetiniñ oktâbr ayında Türkiyege ziyaretini izaatlar eken bildirdi.
Onıñ sözlerine köre, Qırımdan kelgen memurlarnıñ Türkiyedeki Rusiye delegatsiyasınıñ erkânında olmasını aselet gizlegenler ve bunıñ sayesinde olar bu memleketteki tedbirlerde iştirak etip olğanlar.
"Yüz bergenler Türkiyeniñ Ukrayinanıñ topraq bütünligine destek ve Rusiyeniñ Qırımnı işğal etme ıntıluvlarınıñ tanılması ile bağlı resmiy siyasetini aks etmey. Amma aynı zamanda Türkiye memurlarınıñ Rusiye delegatsiyasınıñ erkânında işğal etilgen Qırımdan olğan adamlarnı körmemesi kelecekte böyle ayıp vaziyetlerniñ olmaması içün semereli çareler körmemiz kerek manasına kele", - dep bildirdi o.
Refat Çubarov Türkiye akimiyetinden Qırımdan olğan "resmiy şahıslarnen" temaslarğa yanaşmalarını sertleştirmesini istmek niyetindedir.
Yaltanıñ Rusiye yolbaşçısı Yanina Pavlenko Telegram kanalında Türkiyede buluna, dep tasdıqladı. O, Beylikdüzü belediye yolbaşçısı, yerli ticaret-sanayı odasınıñ vekilinen körüşti, dep bildrdi. Rusiye kütleviy haber vastalarınıñ malümaına köre, eyyet erkânında Yalta Rusiye belediyesiniñ yolbaşçısı Konstantin Şimanovskiy de bar.
Ukrayina Tış işler nazirliginiñ spikeri Oleg Mıkolenkonıñ qayd etkenine köre, Ukrayina topraq bütünligine qoltutqan Türkiye akimiyeti Rusiye provokatsiyasına» kerekli cevap berir ve ileride tekrarlanmasına yol bermez.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
