Qırımtatar Milliy Meclisiniñ azası Gayana Yüksel Ukraina Medeniyet ve haber siyaseti nazirliginiñ kollegiyasınıñ terkibine kirsetildi. Bu aqta o, Facebook saifesinde haber etti.
“Kollegiyanıñ işinde iştirak, alıp barmasında medeniy ve haber saası olğan profil Nazirligi ile işbirlik etip, Qırımnıñ tamır halqınıñ temsiliy organınıñ imkânarını keşleştire. İşimni Qırım ile bağlı olğan Meclis azaları, ukrain ve qırımtatar cemaat teşkilâtları ile beraberlikte amelgen keçirmege niyetindem”, – dep yazdı o.
Yükselniñ qayd etkenine köre, onıñ faaliyeti Qırım tarihınıñ keçmişini, ukrain ve qırımtatar halqınıñ medeniyetini ve ananelerini ögrenmek ve belli ettirmek, Qırımnıñ medeniy asabalığını qorumaq ile bağlı olacaq.
“Şu cümleden işğal etilgen topraqlardaki abidelerniñ ve maddiy medeniyet nesnelerniñ qoruması ve ukrain ve qırımtatar cemaat teşkilâtlarnıñ inkişafına ve destegine diqqat celp etilmesi vastası ile”, – dep qoştı Yüksel.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
