Ukraina prezidenti Volodımır Zelenskıy BM Baş Assambleyasınıñ 75-inci sessiyasında iştirak etecek eyyetni qurmağa vazife berdi. Eyyet erkânına Qırımtatar Milliy Meclisiniñ reisi Refat Çubarov kirsetildi. Bu buyruq oktâbrniñ 5-nde Prezident ofisiniñ saytında derc etildi.
Vesiqağa köre, eyyet erkânına 10 insan kirdi. Çubarovnıñ iştiraki «onıñ razılığınen» belgilendi. Meclis reisi Qırım.Aqiqatqa izaat berip, BM Baş Assambleyasınıñ tedbirlerinde Ukraina eyyeti erkânında iştirak etmege niyetlene, dep tasdıqladı.
Eyyet erkânına Ukraina Tış işler naziri Dmıtro Kuleba, onıñ birinci muavini Emine Ceppar, nazirlikniñ diger vekilleri, Ukraina prezidentiniñ Qırım Muhtar Cumhuriyetindeki daimiy vekili Anton Korınevıç, Ukrainanıñ BM vekili Serğiy Kıslıtsâ, Prezident ofisi, İşğal etilgen topraqlarnıñ reintegratsiya meseleleri nazirligi ve Ukraina Yuqarı Radasınıñ vekilleri kirdi.
BM saytında derc etilgen malümatqa köre, Baş Assambleya er yıl sentâbrniñ üçünci aftasında salı künü toplaşa. Baş Assambleya sentâbrden dekabr ayına qadar faal çalışa, soñra ara berip, yanvar ayında işke başlay ve kün tertibiniñ bütün meseleleri baqılğanına qadar çalışa.
