Qırımtatar Milliy Meclisi Kyivdeki merkeziy ofisiniñ yerini deñiştirmek içün iç bir teklif ve variantnı baqmay. Bunıñ aqqında Milliy Meclisniñ Rusiye ordusınıñ Ukrainanıñ esas qısmına istilâsı telükesi ile bağlı beyanatında yazılır.
Milliy Meclisniñ fikrine köre, Rusiyeniñ Ukrainanıñ esas qısmına tam mıqyaslı arbiy tecavuzı telükesi şaraitinde Ukrainanıñ bütün yuqarı devlet akimiyet ve idare etme organları daimiy yerlerinde olıp öz salâhiyetlerini ömürge keçirmeli.
"Qırımtatar Milliy Meclisi Rusiyeniñ Ukrainanıñ esas qısmına arbiy istilâsını ya da Moskvanıñ Ukrainağa arbiy ücüminiñ başqa stsenariyleriniñ olmasını kerçek ve ihtimal kibi qıymetlendirir", - dep yazıla bildirmede.
Meclis "Ukraina Silâlı Quvetlerine büyük işanç bildire" ve "olarnıñ Ukrainanı mudafaa etmege, onıñ suvereniteti ve topraq bütünligini qorumağa yüksek seviyeyede azır olğanını" qayd ete.
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr etip, ABD ve NATOdan telükesizlik kefaletlerini talap etti – hususan NATOnı şarqqa kenişletmemek. Ğarp vekilleri printsipial meselelerde uzlaşuv olmaycaq, dep bilrdirgen edi.
