Qırımtatar Milliy Meclisiniñ reisi Refat Çubarov Ukraina prezidenti Volodımır Zelenskıyge muracaat etip, onıñ malümatına köre, bir yıldan berli Suriyedeki Al-Hol lagerinden tahliye etilecegini beklegen ukrainalılarnıñ qaytmasına yardım etmesine çağırdı. Çubarovnıñ qayd etkenine köre, lagerde tahminen yüz Ukraina vatandaşı buluna – qadınlar ve çağına yetmegen balaları.
«Diqqatıñıznı tekrar celp etem ki, laf tek qadınlar ve balaları aqqında kete – olar Ukraina vatandaşları ola. Halqara teşkilâtlar Al-Hol lagerindeki şaraitlerni gumanitar buhran olaraq tasvirlemekte: aş, suv ve tibbiy yardım yetmey, balalar hastalıqlardan vefat ete. Er kün 10-20 kişi öle», – dep aytıla muracaatta.
Çubarovnıñ qayd etkenine köre, 2019 senesi mayıs ayında Ukraina Nazirler Şurasındaki müessiselerniñ vekilleri ile celp etilgen alâqalı Ukraina nazirlikleri ve müessiseleriniñ areketlerini keliştirmek içün iş gruppası qurulğan edi.
«Qayd etmek kerek ki, bir qaç ay içinde Ukraina vatandaşlarını tahliyege azırlamaq içün bütün kerekli areketler yapıldı, lâkin tahliye olmadı. Açıq muzakere etilmeycek er şeyni sizge eki kere – 2019 senesiniñ dekabr ayında ve 2020 senesi iyül ayında – mektüp olaraq yollağan edim», – dep qoştı Meclis reisi.
Onıñ bildirgenine köre, evge qaytacağını beklegen Ukraina vatandaşları er afta Qırımtatar Milliy Meclisine muracaat etmege devam ete.
Ukraina prezidentiniñ ofisi bu muracaatqa daa cevap bermedi.
2019 senesi mart ayında Refat Çubarovnıñ haber etkenine köre, 21 qadın ve 54 bala – Ukraina vatandaşları – Suriyede «infrastrukturası yoq etilgen yerlerde zor şaraitlerde» buluna ve Ukrainağa qaytmaq içün yardım soray.
Suriyede 2011 senesinden berli cenk devam ete, onıñ neticesinde 400 biñge yaqın insan elâk oldı.
