Qırımtatar Milliy Meclis reisi Refat Çubarov Facebook musulmanlarnı Oraza bayramınen hayırladı. Ayrıca, qırımtatarlarnı birlik olmağa çağırdı.
«Toprağını sevgen, ana tilini qoruğan, milliy medeniyetni ürmet ve öz adetlerini ürmet etken, rus işğalciler tarafından taqip etilgen semetdeşlerini ve olarnıñ qorantalarını qorçalağan dünya musulman ümmetiniñ bir parçası olğan birdem qırımtatar halqı olaraq qalayıq», – dep yazıla hayırlavda.
Daa Refat Çubarov, kelecek Ramazanda ve soñraki bayramlarda qırımtatar halqınıñ «rus işğalcisinden azat etilgen tuvğan Qırımından birleşip olmsını» tiledi.
Ukraina prezidenti Volodımır Zelenskıynıñ Qırım MC-deki temsilcisi Anton Korineviç ve Ukraina TİN başı Dmıtro Kuleba musulmanlarnı Oraza bayramınen hayırlardılar.
Mayısnıñ 13-nde, cumaaqşamı künü, musulmanlar islâmdaki eki esas bayramdan birini – Oraza bayramını qayd eteler. QMC musulmanları Diniy idaresiniñ müftisi Ayder Rustemov er kesni bayramnen hayırlap, «tınçlıq, muabbetlik ve baht» tiledi.
«Bu bayramnı tuvğan topraqlarınıñ işğali şaraitinde ve işğalci akimiyetniñ devamlı tazyığı altında qarşılıamaq mecburiyetinde qalğan bütün musulmanlarnı, hususan semetdeşlerimini can-yürekten hayırlayım. Er keske iman ve küç tileyim!» – dep yazdı Qırımtatar halqınıñ milliy lideri Mustafa Cemilev Facebook saifesinde.
Мусульмане Крыма и всего мира празднуют Ораза-байрам (фотогалерея)
Rusiye nezaretinde olğan Qırım ve Aqyar musulmanları Diniy idaresiniñ müftisi Emirali Ablayev öz hayırlavında, «bu bayram künlerinde insanlarnı tek öz balalarına degil, yetimlerge de ediyeler bermege, büyüklerni ziyaret etmege ve yañğızoarnı unutmamağa» çağırdı.
Qırımda Oraza bayramı munasebeti ile mayısnıñ 14-yu raatlıq künüdir.
2020 senesi Ukraina prezidenti Volodımır Zelenskıy, Qurban bayramına ve Oraza bayramına devlet diniy bayramı statusını berecek buyruqnı imzalamağa niyetinde olğanını bildirgen edi.
Oraza bayramı künleri yaqınlar tebriklene, mezarlar ziyaret etile, yardımğa muhtac olğanlarğa para berile. Musulmanlar bayram namazı ögüne fitir parasını bermek kerek.
