Cuma künü, yanvarniñ 17-nde, işğal etilgen Qırımda 79 yaşında Qarasuvbazar sakini, qırımtatar milliy areketiniñ veteranı Eldar Şabanov vefat etti. Bu aqta aq qorçalayıcı Abdureşit Cepparov Qırım.Aqiqat mühbirine bildirdi.
«Eldar ağa Şabanov Aqmescitniñ 7-inci şeer hastahanesinde reanimatsiyada vefat etti. Bir qaç kün evelsi onı anda yüregi tutulğan soñ ketirgenler. Bizler, qırımtatar milliy areketiniñ faalleri içün o efsane olıp qalacaq. Bayağı yaşta olıp, yüregi hasta olğanına baqmadan, faal bir insan olmağa devam etken edi», – dep tarif etti aq qorçalayıcı.
Şabanovnıñ vefatı aqqında qırımtatar faali Nariman Celâl, qırımlı jurnalist Lilâ Bucurova, «Qırım ailesi» cemaat teşkilâtınıñ reisi Anife Kurtseitova ve digerleri bildire.
Cenaze bugün üyleden soñ Qarasuvbazar rayonında qılınacaq.
Eldar Şabanov 1940 senesi mayısnıñ 24-nde vefat etti. Anasınen beraber Qırımdan Orta Asiyağa sürgün etilgende dört yaşında edi. Sürgünlik yerlerinde qırımtatar milliy areketine qoşuldı. 1969 senesi Şabanov Qırımğa qayttı. 2 aydan soñ onı pasport rejimini bozğanı içün apiske aldılar. Qırımnı terk etmege mecbur olıp, Abinskte (Krasnodar ülkesi) yerleşti. Mında qırımtatar halqınıñ evine qaytması içün aktsiyalar teşkil etti. 1970 senesi faal kene Qırımğa qayttı. Onı kene apiske aldılar. 1990 senesi faal Qırımtatar Milliy Qurultayınıñ delegatı oldı.
İşğalden soñ Şabanov qırımtatar halqınıñ menfaatlarını qorçalav aktsiyalarında iştirak etti.
