Rusiyede 18 yılğa azatlıqtan marum etilgen Qırım sakini Memet Belâlovnı Kareliyadaki 9-ıncı cezahanege etap etip, sert şaraitli kamerağa yerleştirgenler. Qorantası ondan ne mektüp ala, ne de telefon vastasınen bağlana bile. Bu aqta "Qırım birdemligi"ne onıñ anası Zekiye Belâlova bildirdi.
Oraq ayınıñ 11-de Belâlovnı Rusiye Federatsiyasınıñ Novgorod vilâyetindeki cezahanesinden çıqarğanlar. Çoq vaqıt qorantası onı qayda alıp ketkenlerini bilmey edi. Tek oraq ayınıñ soñunda faal Büyük Novgorodta olğanını haber etip oldı, amma soñki yetüv noqtası o vaqıt oña belli degil edi.
Yaqında qorantası ondan mektüp alğan, mektüpte o, Petrozavodsktaki 9-ncı tüzetüv cezahanesine avuştırılğanını ve birden sert şaraitli barakqa yerleştirilgenini bildirdi. Anasınıñ aytqanına köre, oña qorantasına telefon etmege ruhset berilmey, olar ondan mektüp almaylar.
"O "anam, men sizge bir qaç mektüp yolladım, siz cevap bermeysiñiz, dey. Men ise "senden bir mektüp bile almadım", deyim", — aytıp berdi Zekiye Belâlova.
2017 senesi orta küz ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutıp alğan edi.
FSB olarnı Rusiyede ve onıñ tarafından ilhaq etilgen Qırımda yasaqlanğan "Hizb ut-Tahrir" teşkilâtınıñ azaları olğanında qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2020 senesi sentâbrniñ 16-nda Bağçasaraydaki ekinci "Hizb ut-Tahrir davası" boyunca üküm çıqardı.