Rusiye tarafından casuslıqta qabaatlanğan qırımtatar, Ukrayina vatandaşı Leniye Ümerova Rusiye apishanesinden mektüp yazdı. Bu aqta onıñ ağası Aziz Ümerov Facebook saifesinde haber etti.
''Dostlar, Lefortovo apishanesinden selâmlar! Destegiñiz içün teşekkürler! Ve menim içün qıymetli olğan şeylerni ürmet etkeniñiz ve paylaşqanıñız içün teşekkürler... Birini digerine deñiştirmek - cinayet! Olar meni azatlıqtan marum ete bileler, qafeske oturta bileler, ayatımnı alt-üst ete bileler, amma qıymetlik ve printsiplerimden marum etemezler! Şimdi epimiz içün - ukrainalılar içün qıyın vaqıt! Qıyınlıqlarnı ğururnen yeñip, qıymetli olğan şeylerimizni qaytarayıq! Siziñ Leniyeñiz'', - dep yazdı Ümerova.
2022 senesi dekabr ayında 25 yaşındaki Ümerova Kıyivden Qırımğa ketmek kerek edi, çünki babası onkologiya hastası. Rusiye quvetçileri onı, rejim zonasınıñ qaidelerini bozğanı içün, Gürcistan-Rusiye sıñırından keçken soñ tuttı.
Qırım.Aqiqatqa bergen izaatında yaqalanğan qııznıñ ağası Aziz Ümerov, onıñ qız qardaşı üç aydan ziyade çetel vatandaşları içün merkezde bulunğanını tarif etti. Amma martnıñ 13-nde mahkeme qararı ile onı azat etkenler.
Aman-aman birden Leniynie, vesiqaları olmağanı içün, polis patruli tuttı, dep ikâye etti ağası. Rusiye mahkemesi oña 15 künlik apis cezasını berdi. Bundan soñ qızğa daa eki protokol tizildi - ana-babasına telefon etken telefonını vaqtında qaytarmağanı ve konvoy maşinasından çıqmağa red etkeni içün. Eki vaziyette de mahkeme ukrayinalınıñ apis müddetini 15 künge uzattı.
2023 senesi mayısnıñ 5-nde Moskvanıñ Lefortovo mahkemesi Ümerovanı casuslıqta qabaatlap apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
