Qırımtatar halqınıñ lideri Musafa Cemilev Facebook saifesinde Poloniya tış işler naziri Radoslav Sikorskiyniñ Qırım yarımadasınıñ qanuniy sakinleri kim olğanını teşkergen soñ Qırımnı BMT mandatı altına qanuniy referendumğa azırlıq missiyası ⁇ ile bermege teklifini izaatladı.
Cemilevniñ bildirgenine köre, Sikorskiniñ delilleri onı şaşırtqan.
"Radoslav Sikorskiyniñ Qırım Rusiye içün timsal olaraq qullanıla ve bu sebepten işğal etilgen Qırımnı Ukrayinağa qaytarmamaq, degen lafları şaşıqta. Eger er bir memleket başqa memleketniñ topraqlarını işğalciler içün müim olğanına köre zapt etmek mümkün ve maqbul saysa, ve dünya toplulığı bunı qabul etse, dünyamız tezden nasıl bir cenk meydanına çevirilecegini tasavur etmek mümkün", — dep yazdı Cemilev.
O, Poloniya Tış işler naziriniñ 20 yıldan soñ BMT imayesi altında Qırımnıñ kelecekteki statusı aqqında referendumnı keçirmek teklifini "qabul etilmez" dep adlandırdı.
"Qırımnıñ kelecekteki statusı aqqında 20 yıl soñra BMT imayesi altında referendumnı keçirmek teklifi de qabul etilmey. Eger bir memlekette referendum kerek olsa, onı yalıñız bu topraqnı qanuniy olaraq zapt etken memleket keçire bile, BMT ya da diger halqara teşkilâtlar ise, onıñ keçirilmesi vaqtında açıqlıq ve adaletni temin etmek içün öz közeticilerini yollay bileler", — dep qoştı qırımtatar halqınıñ lideri.
Cemilev, Sikorskiyniñ teklifleri "adalet ve halqara uquqqa uymağanını" bildirdi.
"Şübesiz ki, o, bir kimsege iç bir vaqıt telüke köstermegen tınç bir memlekette bir çoq insan canını alğan ve büyük viraneler ketirgen qanlı cenkniñ toqtatılmasını istey. Amma bu cenkni toqtatmaq içün teklif etken tedbirler adalet printsiplerine ve halqara uquqqa uymağanını körem", — dep qayd etti Cemilev.
Qırımtatar halqınıñ lideri qoştı ki, "Rusiyeniñ bir qaç yılğa BMT nezareti altına berilmesi maqsatqa uyğun olur edi, çünki iç olmağanda bir qaç yılğa tış idare kirsetilmese, bu memleket iç bir vaqıt medeniy ve demokratik olmaycaq".
Poloniya tış işler naziri Radoslav Sikorskiyniñ fikrince, Ukrayina ve Rusiye arasında barışıq şartları muzakere etilse, Qırımnıñ emiyeti büyüktir. Bu fikirni Poloniya Tış işler naziriniñ yolbaşçısı YES-niñ Kıyivdeki 20-nci er yıllıq körüşüvinde bildirdi, dep yaza İnterfaks-Ukrayina.
Poloniya naziriniñ beyanatına Ukrayina prezidenti ofisiniñ yolbaşçısı Andriy Yermak seslendi.
"Qırım Ukrayinadır. Rusiye halqara uquqnı bozdı ve bunıñ içün cevap bermeli", — dep yazdı o Telegram kanalında.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
