Kişinöv ava limanında Moldova mahsus hızmetleri tarafından sıñır nezaretinden keçken Ukrayina vatandaşı, Ukrayina halq deputatı Mustafa Cemilevniñ yardımcısı, qırımlı Erol Veliyev tutıldı.
Bunı içtimaiy ağlardaki saifelerinde Qırımtatar Milliy Meclisiniñ reisi Refat Çubarov bildirdi.
"Bizim qasevetimiz, Erol Veliyev Ukrayina halq deputatı Mustafa Cemilevniñ yardımcısı olğanı ve Rusiye tarafından apiske alınmaq kerek olğan terroristler cedveline kirsetilgen bir çoq qırımtatardan biri olğanı ile bağlıdır", — dep yazdı Çubarov.
Çubarovnıñ bildirgenine köre, vaziyet aqqında Ukrayina Tışqı işler nazirligi ve Moldovadaki Ukrayina elçiligi haberdar etildi. O şunı da qoştı ki, "Qırımtatar halqı Meclisi Ukrayina vatandaşı Erol Veliyevniñ aqlarını qorçalavğa doğrultılğan diger tedbirlerni de qabul ete".
Ukrayina Yuqarı Radasınıñ deputatı Mustafa Cemilevniñ yardımcısı Erol Veliyev Rusiye FSB-si tarafından qıdıruvğa ilân etildi, qabaatlavlar oña ğıyabiy şekilde seslendirilgen. Rusiye quvetçileri, Qırımda Veliyev tarafından teşkil etilgen ekstremist gruppasınıñ faaliyetini toqtatqanlarını bildirdiler. Rusiye mahsus hızmetiniñ bildirgenine köre, "Harkivde teşkil etilgen gruppa terkibine Veliyevden ğayrı sabıq boksçu-sportçular Steşenko ve Tretyakov kirdi".
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
