Link açıqlığı

Saatnıñ esas haberi

Qırımtatar genotsidiniñ qurbanlarını añma kününde Kyiv Klezmer Festte bayram programması olmaycaq – teşkilâtçılar


Kyiv Klezmer Festival, nümüneviy resim
Kyiv Klezmer Festival, nümüneviy resim

Mayısnıñ 18-nde, Qırımtatar halqı genotsidiniñ qurbanlarını añma kününde, Kyiv Klezmer Festival zemaneviy klezmer muzıkası ve Avropa medeniyet festivali sanasında eglenceli ve muzıkalı programma olmaycaq. Bu aqta festival teşkilâtçılarınıñ qırımtatar cemaatçılığınıñ festival kününiñ hatıra kününe rastkelgeni sebebinden qasevetlengenine berilgen cevabında aytıla.

«Mayısnıñ 18-nde Kontraktova meydanında festivalimizniñ tedbirlerinden biri (festival Yazıcılar birliginiñ evinde mayısnıñ 7-nde «Şolom Aleyhem, Kiyev» oyunından başlanacaq) ötkerilecek, qırımtatar dostlarımıznen beraber Qırımtatar halqı genotsidiniñ qurbanlarını añma kününe bağışlanğan hatıra tedbirleriniñ keçirilmesini planlaştırdıq. Bizge qoşulıp, qırımtatar qardaşlarımızğa qoltutmağa davet etemiz, saat 12:00-den başlap sverde, Sağaydaçnıy abidesi yanında, qırımtatar stendinde», – dep aytıla haberde.

Teşkilâtçılar 2019 senesi mayısnıñ 18-nde Şabat ola, dep qayd ete – yeudiyler içün mubarek bir kün, olar sinagoganı ziyaret etmekten ğayrı, bir de bir tedbir keçirilmesini planlaştırmay ve keçirmey.

Aynı vaqıtta, festivalniñ cedvelinde mayısnıñ 18-i saytında muzıka taqımlarınıñ çıqışları programması kirsetildi.

Qırımtatar Milliy Meclisiniñ reisi Refat Çubarov festival teşkilâtçılarınıñ beyanatına Facebookta cevap berdi.

«Vesiqa müelliflerine añlatqanları içün teşekkürler bildiremiz. Mayısnıñ 18-nde – Qırımtatar halqı genotsidiniñ qurbanlarını añma kününde – festival çerçivesinde insanlarnıñ duyğularını ıncıtacaq tedbirler olmaycaq, dep ümüt etemiz», – dep yazdı Çubarov.

Daa evel qırımtatar faali Erfan Kudusov Kyiv şeer devlet memuriyetine Kyiv şeer yolbaşçısı Vitaliy Kliçkoğa muracaat etip, 2019 senesi mayısnıñ 18-nde Podilde qırımtatar halqı sürgünliginiñ 75 yılı kününde eglenceli tedbirlerni lâğu etmege ya da başqa künge avuştırmağa teklif etti.

Kyiv şeer devlet memuriyeti vaziyetni şimdilik açıq sürette izaatlamadı.

Kyiv Klezmer Festival – 2018 senesi teşkil etilgen zemaneviy klezmer muzıkası ve Avropa medeniyeti halqara festivali. Bu sene o, mayısnıñ 7-nden 25-ne qadar keçecek.

Mayısnıñ 18-nde Ukraina ve dünyada qırımtatar halqınıñ 1944 senesi Qırımdan sürgün etilüviniñ qurbanları añılmaqta. Şu künü qırımtatarlar tolu birinci eşelon yarımadadan Orta Asiyağa yollanğan edi. Umumen 180 biñ kişi sürgün etildi.

Şu künü qırımtatar sürgünliginiñ qurbanlarını añma tedbirleri keçirile.

Ukraina Yuqarı Radasınıñ qararına köre, mayısnıñ 18-i Qırımtatar halqınıñ genotsid qurbanlarını añma künü olaraq ilân etildi.

XS
SM
MD
LG