"Uquq ceetinden qarar elbette qanunsızdır. Çünki teşkerüv obyektiv degil ve bir taraflı keçirilgen. Yalıñız devlet hızmetiniñ hadimleri ile laf etildi - bular ölümni tesbit etken SİZO müdiri ve feldşer. Amma olar da Gafarovnıñ sağlıq alından daima şikâyet etkenini bildirdiler. Bunı iç birisi red etmey", - dep bildirdi Rifat Yahin.
O, tahqiqatçılar Novoçerkasknıñ 2-nci SİZO-sında Gafarovnen beraber bir kamerada oturğanlarnen laf etmegenlerini qayd etti. Gafarovnı Rostov-na-Donudaki 5-nci SİZO-dan Novoçerkaskqa etap etken közeticilernen de laf etmegenler. Advokat Yahin dava açmaqnı red etme qararında devletniñ dinamikasını körmegenini ve bu red qararına mahkemede da prokuraturada itiraz etecekmi yoqmı şimdilik daa bilmegenini ayttı.
Fevral ayında Qırımlı aq qorçalayıcılar Rusiye tarafından «qırımlı musulmanlar davasına» istinaden mahküm etilgen ve siyasiy mabüs dep tanılğan qırımlı Cemil Gafarovnıñ Rusiye SİZOsında vefat etkeni aqqında bildirdi.
Aqmescit rayonındaki Mamaq köyüniñ sakini Cemil Gafarov dört yıldan berli Rusiye apsinde yattı. Bu yıl yanvarniñ başında Rostov-na-Donu Cenübiy okrugınıñ arbiy mahkemesi «25-niñ davası» olaraq belli cinaiy dava boyunca 13 yılğa azatlıqtan marum etildi. Dava çerçivesinde Rusiye uquq qoruyıcıları 25 qırımlı musulmannı terrorizmde qabaatladı, çoqusı apiske alınmazdan evel faal vatandaş edi, «Qırım birdemligi» cemaat birleşmesi çerçivesinde faal ve vatandaş jurnalistleri olaraq belli edi.
Cemil Gafarovnıñ sağlıq problemleri apiske alınmazdan evel de bar edi. Üçünci derece saqatı edi. Ömür arqadaşı Raziye Gafarovanıñ aytqanına köre, qırımlınıñ dördünci derece büyrek yetersizligi, gipertoniya ve yürek hastalığı bar. O, miokard infarktını keçirdi ve SİZO şaraitlerinde olmağan büyrek dializine ihtiyacı bar edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
