Qırım apiske alınğan Ukraina deñiz askerleri içün yardım toplay (video)
Apiske alınğan Ukraina deñiz askerlerine bütün Qırımdan yardım kele. İnsanlar aş, gigiyena eşyaları ve urba ketire. Çoqusı maddiy yardım köstere – noyabrniñ 29-ı sabağa qadar 210 biñ ruble toplandı. Faaller Aqmescit SİZOsına barıp bularnı bermege azırlanğanda deñizcilerni Moskvadaki «Lefortovo» izolâtorına avuştırdılar. Amma, faallerniñ qayd etkenine köre, yardım deñizcilerniñ bulunğan yerine baqmadan barıp çıqar. Keriç boğazında Rusiye mahsus hızmetleri tarafından açılğan ateşke oğrağan ve esir alınğan 24 Ukraina deñiz askeri eki ayğa apiske alındı. İzolâtorğa olarnı şahsiy eşyalarsız qapattılar. Zapt etilgen Ukraina gemilerinden bir şey almağa imkân berilmedi.