Qırımtatar milliy areketiniñ faalleri Qarasuvbazarda tintüv keçirilgenini bildire.
Qırımdaki bir kişilik narazılıqlarnıñ iştirakçisi Emir-Üsein Eldar Facebookta bildirgenine köre, tintüv «Tavrida» yolunı qurğan «Vad» yol şirketine binanı kirağa bergen insannıñ evinde yapıla. Faalniñ malümatına köre, tintüv «gizli migrantlar» sebebinden keçirile.
Qırımtatar faali Zair Smedlâ yazğanına köre, tintüv Alim Kroşnıñ evinde İndustrialnaya soq., 15, «KrımOpt» yanında keçirile.
Rusiye uquq qoruyıcı hızmetleri bu malümatnı daa izaatlamadı.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirmege başladı.
