İyülniñ 10-11-nde Moskvanıñ Qızıl meydanına Bağçasaraydaki birinci «Hizb ut-Tahrir davasınıñ» mabüslerine qoltutmağa çıqqan qırımtatar faallerini Qırımda Rusiye politsiyasınıñ bölügine çağıralar.
Bu aqta «Qırım birdemligi» qırımlı advokat Nazim Şeyhmambetovnıñ malümatına esaslanıp bildire.
«Bu haberlerge köre, Moskvadaki aktsiyalarnıñ bazı iştirakçilerine uquq qoruyıcı organları telefon etip, olarnı politsiyağa «subetke» çağırdı. Tafsilâtlı malümatımız şimdilik yoq», – dep ayta advokat.
Onıñ bildirgenine köre, Moskvada tutulğan qırımlılarğa qarşı memuriy protokollar endi tizildi. Advokat bunı «fikrini bildirgen insanlarğa qarşı basqı» olaraq tanıy.
«Al-azırda olarnı davet etmek içün uquqiy sebepler yoq. Bir teşkerüv teşkil etildi, onıñ çerçivesinde insanlar soraştırıla bile. Bizler operativ-qıdıruv tedbirleriniñ keçirilmesi içün Qırımda böyle bir teşkerüv teşkil etilgenini tahmin etemiz», – dep tüşüne Nazim Şeyhmambetov.
Qırımdaki Rusiye uquq qoruyıcı müessiseleriniñ bunıñnen bağlı açıq izaatları yoq.
Moskvada iyülniñ 10-11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 50-den ziyade insannı tuttı. Qızıl meydanda tutulğan qırımtatarlarnıñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.
İyülniñ 11-nde mahkemesi dört qırımtatarı Zevri Abseitov, Remzi Memetov, Rustem Abiltarov ve Enver Mamutovnıñ ükmüne qarşı berilgen temyiz arizasını baqtı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
