Qırımda qırımtatar faalleri Ramazan ayında oraza tutqan qırımtatar siyasiy mabüslerine kütleviy aş yollamalarnı azırladı. Yollamalarnı Qırım ve Rusiyedeki izolâtor ve koloniyalarğa yiberecekler. Bunı Qırım.Aqiqatqa "Qırım birdemligi"niñ koordinatorı Server Çolakçik haber etti.
"Halqımız siyasiy mabüslerniñ cinayetkâr olğanınen iç bir vaqıt razı olmaz. Qanunsız maküm etilgenlerge yardım etmek istegi er sefer vatandaşlarımızğa yardım köstermek içün yañı yollarnı tapa. Ve bugün, Ramazan ayında, SİZOda orazanı tutmaq ne qadar qıyın olğanını añlap, apislilerge aşayt mallarınen küçük yollamalar yiberip olarnı destekleycek oldıq. İşte böyle nevbetteki "Esir içün iftar" teşebbüsimiz peyda oldı", - haber etti Çolakçik.
Faalniñ aytqanına köre, yigirmeden ziyade mabüske yollanma artıq yiberildi.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
