Bu aqta "Qırım birdemligi" mabüslerniñ tuvğanlarına atıf etip bildire.
Faal Seydamet Mustafayevniñ anası Esma, apiske alınğanlarnıñ qorantalarına Aqmescitniñ 2-nci SİZO-sında bir yıl devamında tuvğanlarınen körüşmege bermey ediler, dep tarif etti. Tek Eldar Yakubovnıñ qadını Ayşe, sekiz ay beklegen soñ ve bir qaç kere red etilgen soñ — qısqa müddetli körüşüvde aqayınen körüşip oldı.
"Bizge körüşüv bile bermey ediler", — dep tarif etti Esma Seydametova. — Olar pek yahşı körüne, bütün büyük selâm yolladılar ve cemaatnı körmege sevindiler, öz problemlerinen yalıñız olmağanlarını ve kimse çette qalmağanını añladılar".
Advokat Edem Semedlâyevniñ aytqanına köre, oturışuvda prokuror tahminen eki saat devamında qabaatlav qararını oqudı. Advokatnıñ aytqanına köre, mahkemeciniñ öz çıqışını qısqartmaq ricasına devlet qabaatlayıcısı cevap bermedi ve vesiqanı başından-soñunace oqudı.
Bundan ğayrı, davanıñ bütün altı iştirakçisi mahkemede özlerini qabaatlı saymağanlarını ve qabaatlanğan cinayetlerni yapmağanlarını beyan ettiler. Edem Semedlâyevniñ aytqanına köre, bugünki toplaşuv birinci degil edi. Onı avgustnıñ 12-nde keçirmekni planlaştırılğan edi, amma o vaqıt Rostov-na-Donu 1-nci SİZO-dan Remzi Nimetulayevni mahkemege ketirmediler. Mahkemede teslim etüvniñ sebebi aytılmadı.
2023 senesi avgustnıñ 24-nde, "Qırım platforması" sammitinden soñ ertesi künü, Rusiye quvetçileri altı qırımtatarını yaqaladı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Ümerov, Eldar Yakubov ve Abdulmecit Seytumerovnıñ evlerinde tintüvler keçirildi.
Aynı şu künü Rusiye kontrolindeki Aqmescitniñ Kıyiv rayon mahkemesi Ruslan Asanov, Amethan Ümerov ve Remzi Nimetulayevni eki ayğa SİZO-ğa yolladı. Tutulğanlarnıñ episi Rusiye Federatsiyası Ceza kodeksiniñ 205.5 maddesiniñ birinci qısmına istinaden şübheli sayıla. Söz Rusiyede yasaq etilgen "Hizb ut-Tahrir" teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
