"Qırım musulmanları davası"nda 11 yıl apis cezasına mahküm etilgen qırımtatar Yaşar Şihametovnı ciddiy sırt problemleri sebebinden mahkeme zalından bir sediye ile alıp çıqardılar. Bunı "Qırım birdemligi" advokat Aleksey Ladinge atıf etip bildire.
Vlasihadaki istinaf mahkemesiniñ oturı vaqtında Yaşar Şihametov özüni yaramay is etkeninden şikâyet etken. Mahkeme oturışı başlamazdan evel qırımtatar advokatına yürek ve büyrek ağrısından aytınğan. Neticede mahkeme zalından sadiye ile alıp çıqarğanlar. Ekim tarafından baqılğan soñ onı keri zalğa ketirgenler. Ekim, erkek mahkeme oturışında iştirak ete bile, dep aytqan.
Mahkeme oturışı neticesinde Şihametovnıñ ükmü deñiştirilmegen. Mudafaa tarafı davadaki şaatlarnıñ gizliliginiñ açılmasında ve şaatlıqlarınıñ qabul etilmez ilân etilmesinde israr etken. Mahkeme bundan red etken.
2021 senesi fevral ayında Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
