Qırımtatar faali, aq qorçalayıcı, Yaltadaki «Hizb ut-Tahrir davasınıñ» mabüsi Emir-Usein Kuku çarşenbe künü, iyünniñ 26-nda, 43 yaşını toldurdı. Öz doğğan kününde Kuku Rostov-na-Donunıñ SİZOsında buluna.
«Bugün daa bir semetdeşimiz aile yanında tuvğanları ve yaqınlarından hayırlavlarnı alıp olamay… «Qırım birdemligi» cemaat birleşmesi adından Emir-Useinni tebriklep, metanet ve sabır tileymiz. Bütün bu vaqıt devamında semetdeşlerimiz yaqın vaqıtta qorantalarına qaytıp, tuvğan insanlarını qayğıracaq, balalarınıñ muvafaqiyetlerine quvanacaq ve olarğa baba sevgisi ve diqqatını bağışlaycaqlar, dep ümüt etemiz», – dep hayırladı Emir-Usein Kukunı «Qırım birdemligi» cemaat birleşmesi.
Qırımlı aq qorçalayıcı Emir-Usein Kuku Yaltada 2016 senesi tutulğan edi. Rusiye tahqiqatı onı Rusiyede yasaqlanğan «Hizb ut-Tahrir» islâm siyasiy teşkilâtı ile alâqaları bar olğanında qabaatladı. Rusiye arbiy mahkemesi Yaltadaki «Hizb ut-Tahrir davasını» Aqmescitte çıqış oturışuvlarında baqqan edi, soñra apiske alınğan qırımlılar, şu cümleden Kuku, Rostov-na-Donuğa avuştırıldı. Al-azırda Kuku Rostov-na-Donu SİZOsında apiste buluna.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
