Qırımtatar faali, "Qırım musulmanları davası"nıñ figurantı Ernes Seytosmanov, apishanesiniñ keyfiyetsiz şaraitleri aqqında bildirdi. Bu aqta "Qırım birdemligi"ne qırımlınıñ tuvğanları bildirdi.
Bildirilgenine köre, Seytosmanovnı 1,5*2 metrlik kamerada tutalar. Aynı zamanda odada dımlılıq bar ve "er şey tökülmekte", avalandıruv yoq. Suvnı o, borudan içmege mecbur.
Faallerniñ malümatına köre, Seytosmanovnı eki kere ceza izolâtorına yollağanlar. Birinci kere yanvarniñ başında apishanege kelgen soñ beş künge. Nezaretçilerniñ aytqanına köre, qırımlı etap vaqtında uquqnı bozğan eken. Ekinci kere martnıñ 17-nde 15 künge – "kameralarara bağ" içün. Bunıñnen beraber, haber etilgenine köre, cinaiy işniñ baqılması içün komissiya toplanmağan.
Seytosmanov soy-soplarınen subetleşmek içün üç kere ariza bergen, lâkin olarğa cevap berilmegen, şunıñ içün aqay tuvğanlarınen bağlanıp olamay, dep haber ete "Qırım birdemligi". Tuvğanlarınen körüşüvler de olmay.
Seytosmanov 2022 senesi fevral ayında Rusiye tintüvlerinden soñ tutuldı. Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernes Seytosmanov ve Amethan Abdulvapov.
Episi Rusiyede terror, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» islâm siyasiy firqasında iştirak etkeninde qabaatlandı. «Memorial» «Hizb ut-Tahrir davasının» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
