İşğalciler tarafından apis cezasına mahküm etilgen qırımtatar Rustem Seythalilov Novoçerkask SİZO-sından Ulânovsk vilâyetindeki cezahanelerden birine etap etile.
Bunıñ aqqında sentâbrniñ 4-nde "Qırım birdemligi" cemaat birleşmesi Seythalilovnıñ ömür arqadaşı Elzarağa atfı etip haber etti. Siyasiy mabüs Volgograd cezahanesiniñ tranzit noqtasında bulunır eken apayına mektüp yazğan.
"Malüm olğanı kibi, büyük ihtimalnen o Ulânovsk vilâyetinde qalacaq", - dep bildirdi Seythalilova.
Rusiyeniñ Ulânovsk vilâyetindeki qaysı cezahanege etap etilgeni belli degil.
Rustem Halilov — "Qırım birdemligi" cemaat birleşmesiniñ faali. Tefqif etilmezden evel Qırımda siyasiy mabüslerniñ qorantalarına yardım ete edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2023 senesi martnıñ 18-nde Rusiyeniñ Rostov-na-Donu mahkemesi «Qırım birdemliginiñ» beş faaline üküm çıqardı. Qırımtatar faalleri Akim Bekirov, Seytveli Seytabdiyev, Rustem Seythalilov 14 yılğa, Eskender Suleymanov ve Asan Yanikov 15 yılğa koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
