Jurnalist Elvina Seitbulayeva tarafından ğayıp olğanı bildirilgen qırımtatar faali Ruslan Lümanovnı Rusiye Federatsiyasınıñ FSB hadimleri tutıp esir etken. Bunı Qırımtatar Milliy Meclisiniñ reisi Refat Çubarov Qırımdaki menbalarına atfı etip haber etti.
"Yançıq işğal etilgen Qırımdan haber keldi: tünevin mayısnıñ 24-nde saat 13:00 ğayıp olğan qırımtatar faali, beş balanıñ babası Ruslan Lümanovnıñ Rusiye FSB-sı tutıp esir etkeni ve bugünki aqşamğa qadar onı mecburen tutqanı belli oldı", - dep yazdı Çubarov.
Çubarovnıñ sözlerine köre, Lümanovnıñ tutıp esir etilmesiniñ sebepleri belli degil.
RF FSB-sı bu malümatnı izaatlamadı.
Mayısnıñ 25-nde jurnalist Elvina Seitbullayeva Ruslan Lümanovnıñ ömür arqadaşı Evelina Lümanovağa atfı etip, qırımtatar faaliniñ ğayıp olması aqqında bildirdi.
Ukrayina Devlet mülkü fondunıñ yolbaşçısı Rustem Umerov Lümanovnıñ ğayıp oluvını «qırımtatarlarğa qarşı daa bir repressiya» dep adlandırdı.
«Ruslan – büyük dostumızdır, yıllarnen Qırımda qırımtatar siyasiy mabüslerine ve qorantalarına yardım ete, «mahkemelerge» bara, serbest Qırım içün cenkleşe», – dep yazdı Umerov.
Lümanovnıñ ailesi poliske muracaat berip, ğayıp olğanına dair ariza yazdı. Faalni soñki sefer maşinada Aqmescit rayonındaki Mamaq (Stroganovka) köyüniñ çıqışında körgenler.
Rusiyede ve işğali altındaki topraqlarda Ukrayina tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
