Qırımda Rusiye quvetçileri qırımtatar faali Ruslan Asanovnı Aqmescit psihiatriya hastahanesine yollağanlar, dep haber ete «Qırım birdemligi» cemaat birleşmesi advokat Zera Mustafayevanıñ malümatına esaslanıp.
Qararnıñ cinayet davası boyunca başlanğıç tahqiqat çerçivesinde berilgeni iddia etile.
"Advokat Refat Yunusovdan aqayım ekspertiza içün psihiatriya hastahanesine yollanğanını bildim. O 2-nci SİZO-ğa Ruslannı yoqlamaq içün keldi, amma o anda yoq edi", - dep ayttı o.
Bundan evel Remzi Nimetulayevni psihiatriya hastahanesine yollağan ediler.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
