17 yıl apis cezasına mahküm etilgen qırımtatar faali Marlen Mustafayev Rusiyeniñ Ulânovsk apishanesine etap etilgen. Bunı "Qırım birdemligi" cemaat birleşmesi haber etti.
"2023 senesi sentâbrniñ 22-nde qırımtatar Marlen Mustafayev Rostov vilâyetindeki Novoçerkask SİZO-sından Ulânovks vilâyetiniñ Dimitrovgrad şeerindeki apishanege ettap etildi. Tuvğanları bulunğan yeri aqqında tek bir aydan soñ bildiler", - dep yazıla bildirmede.
2022 senesi noyabrniñ 30-nda Rostov-na-Donudaki Cenübiy okrugınıñ arbiy mahkemesi qarasuvbazarlı qırımtatar faali, «qırımlı musulmanlar davasınıñ» mabüsi Marlen Mustafayevni 17 yıl koloniyada qalmasına üküm etti. Mustafayev ilk 3 yılnı apishanede keçirecek ve apis cezasından soñ 1 yıl 6 ayğa sıñırlavları olacaq.
Marlen Mustafayev – siyasiy mabüslerniñ mahkemelerine barğan ve qorantalarına yardım etken qırımtatar faalidir. Apiske alınmazdan evel maşinalarnı tamir ete edi.
Mustafayev 2022 senesi fevral ayında Rusiye tintüvlerinden soñ apiske alındı. Qırımnıñ bir qaç rayonında Rusiye uquq qoruyıcıları dört insannı tuttı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terror teşkilâtı olaraq tanılğan, amma bir çoq memleketniñ milliy qanunları seviyesinde areket etken «Hizb ut-Tahrir» islâm siyasiy firqasında iştirak etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
